Ginpamilit ni Department of Education (DepEd) secretary Leonor Briones nga “bastante” na ang suweldo sa karon sang mga public school teachers.
Pahayag ini sang tiglikom sa pihak sang mga panawagan sang pila ka grupo sang mga manunudlo sa Pilipinas nga lubos na nga pataasan ang ila ginabaton nga bulanan nga suweldo.
Ini suno sa ila bisan nga makabaton sila sang pagsaka sa suweldo subong mnga tuig bangud sa ikatlo nga tranche sang Salary Standardization Law ukon SSL.
Suno kay Briones bastante na ang ginabaton nga suweldo sang mga manunudlo sa pampubliko nga mga buluthuan ilabi na ang mga nakabase sa probinsya.
Ini bangud magluwas kuno sa suweldo nga ginabaton sang mga public school teachers, may mga bonuses, allowances, cash gifts kag incentives pa nga ginabaton ang mga ini.
Kon ikumparar kuno sa iban nga propesyon sa pungsod, mas nakaabanse ang mga public school teachers bangud sa mga extra benefits nga ginabaton sang mga ini.
Magluwas diri, 30 tubtub 50% man nga mas mataas ang entry level sang mga manunudlo sa pampubliko nga buluthuan kon ikumparar sa mga yara sa private schools.
Suno kay Briones, ang teacher 1 sa public school ang naga-sweldo sang masobra 20 mil pesos kada bulan samtang ang master teacher naman kuno ang may bulanan nga suweldo nga masobra 52 mil pesos magluwas pa sa iban nga incentives, bonuses kag allowances sang mga ini.
