British National nakahilak sa dakong pasalamat nga nauli ang iyang bag nga dunay 40 mil pesos ug mahalon nga laptop ug cellphone, pounds ug euros, Pinay girlfriend nagpasalamat sa 24 anyos nga babayi nga nakakita sa bag

Dako ang pasalamat sa usa ka British National ug sa Pinay girlfriend niini nga nauli ngadto kanila ang ilang kwarta ug mga mahalon nga butang nga ilang nabiyaan sa taxi nga ilang gisakyan niadtong Marso 18,2018 adlawng Domingo.
Si Marilyn Ebardone ug ang iyang hinigugma nga si Andrew David Matthews , personal nga nibisita sa DYHP RMN CEBU diin iyang gikahimamat ang usa ka 24 anyos nga inahan nga si Mela Sabal nga maoy nakakita sa bag nga dunay *4**0 mill pesos cash, 60 pounds, 75 euros , Apple macbook, I-phone 6, bankbook, pocket wifi ug duha ka passports.*
Na-emosyonal ug nakahilak pa si Matthews sa dihang gi-interview sa DYHP kabahin sa iyang reaksyon nga nakit-an ug nauli ang iyang kwarta ug mahalong butang.
Matud ni Matthews nga wala na siya magtuo nga mauli pa ang iyang kwarta ug mga butang tungod sa dakong salapi ug ka mahalon sa butang nga nahibilin sa taxi, hinungdan nga nakahilak kini sa pagkamatinud-anon ug maayong ehemplo nga gipakita ni Sabal taliwa sa iyang kapobre.
Gidugang ni Matthews nga napun-an ang iyang maayong impresyon ug pagdayig sa Pilipinas labi na sa Sugbo tungod sa maayong gawi ni Sabal, kini taliwa sa dili usab maayong imahi nga nadunggan sa British National kabahin sa Pilipinas.
Si Sabal , adunay duha ka anak nga 7 anyos ug 3 anyos, ug usa ka construction worker ang bana niini.
Matud ni Sabal nga nangita siya og paagi nga makontak ang tag-iya sa nahibilin nga bag nga sila si Matthews ug Ebardone apan pakyas siya sa pagkontak niini tungod kay wal a man siya makakita og contact number sa bag, hinungdan nga ang maong butang ug kwarta iyang giturn-over sa DYHP.
Gidugang ni Sabal nga anaa sa iyang hunahuna ang pag-uli sa butang sa dihang iya kining nakit-an tungod kay dili mahimutang ang iyang hunahuna ug lain ang iyang gibati nga magtinir ug butang nga dili iyaha ug labaw sa tanan mahadlok siya sa karma.
Nagpasalamat usab ang British National ug ang Pinay girlfriend nga si Marilyn sa tabang sa DYHP nga maoy nangita og paagi aron sila makontak ug mapahibaw nga nakit-an ang ilang butang ug kwarta.
Nasayran usab nga si Matthews molarga na sa Europe karong buwan sa Abril ug human sa tulo ka buwan mobalik na usab kini sa Pilipinas aron pakaslan na ang iyang Pinay girlfriend.

Facebook Comments