Broker nadakpan sa buy-bust operation

13

Davao City- Tingkagol ang usa ka broker human nadakpan sa buy-bust operation nga gikasa sa Station Drug Enforcement Unit sa Sasa PNP, 1:00 sa hapon sa miaging adlaw.

Wala makapalag si Benjamine Gamiri Jr, 41 anyos, ulitawo, broker, residente sa Bajada ning siyudad dihang giposasan kini sa mga otoridad human gitunol ang shabu sa pulis nga nipalit kaniya.

Sa pagkapkap sa mga otoridad kaniya, laing sachet sa shabu ang narekober lakip na ang usa ka libo ka pesos nga mark money, cellphone ug drug paraphernalia.

Nasayran nga usa lamang si Gamiri sa mga dayo nga nagsuplay og droga sa Sasa area.

Pinaagi sa tabang sa nagpakabanang tawo, nabulgar ang iligal nga kalihukan sa suspek ug malampuson nakabaton og linya ang kapulisan ngadto kang Gamiri kinsa unang giila nga si alyas Mir.

Mikubit sa lit-ag ang suspek sa pasiunang mga transaksiyon maong wala na mag-usik og kahigayonan ang mga otoridad sa pagluto og operasyon batok ni Gamiri.

Pinaagi sa mando ni Police Chief Inspector Reuben Libera gikasa ang buy-bust operation sa gipundohan nga inn sa may JP Laurel resulta sa pagkadakop sa suspetsado.

Kasong kalapasan sa Section 5 ug 11 sa article 2 sa Republic Act 9165 kun Comprehensive Dangerous Drugs Act of 2002 ang gisang-at sa kapulisan ngadto sa piskalya batok kang Gamiri.

RadyoMaN Joel Viray

Facebook Comments