Roxas City, Capiz – Nag-apelar subong sang bulig ang pamilya sang 38-anyos nga saleslady nga nasapwan nga patay sa sulod sang apartment nga iya ginapuy-an sa 13 Unit P, 2nd floor, Flores Apartment, Agustin Drive, Sta Lucia Village, Panapaan 6, Bacoor City, Cavite.
Base sa report, nag-angkon sang madamo nga kapilasan sa lawas ang biktima nga si May Bulquerin, 38-anyos, may live-in partner kag tumandok sang Sitio Camancilis Brgy. Bonga, Panay, Capiz.
Person of interest subong ang isa ka lalaki nga wala pa ginhingadlan sang mga kapulisan. Apang ginklaro ni SPO2 Feliciano Garcia II, sang Bacoor City Police Station kag imbestigador sang kaso nga wala pa sang direkta nga naga-angut sa amu nga suspek maluwas sa pila ka mga sirkumtansiya kalakip ang pila ka mga post sa Facebook kun sa diin makait-an ang laragway sang biktima kag isa pa ka lalaki kag ang posibilidad nga siya ang bisita sang biktima antes ini nasapwan nga patay.
Suno sa ila imbestigasyon, alas sais sang gab-e nag-abot sa ila poluy-an halin sa eskuwelahan ang anak sini nga 19-anyos nga si John Albert Bulquerin apang naglakat ini agud magpaligad sang oras sang makit-an nga sarado ang ila apartment.
Alas 10 na sang gab-i sang ini ang nag-abot apang sirado sa gihapon, gani nga nagduda na siya kabangdanan nga nagpangayo sang bulig sa mga kahilapit. Pwersahan nga ginsamad ang pwertahan kag didto na nagtampad sa iya panulokan ang duguon nga lawas sang iloy sa diin tadtad sang buno.
Sa ginpatigayon nga imbentaryo sang kapulisan, nadula ang cellphone sang biktima nga Oppo A3s kag Apple mini Ipod.
Padayon pa tubtob sa subong ang imbestigasyon sang mga kapulisan agud nga matumod ang responsable sa krimen. Samtang panawagan snag iya pamilya ang gilayon nga hustisya sa kamatayon sini. Nagapangayo man ang mga ini sang bulig agud nga madala pabalik sa Capiz ang bangkay ni May Bulquerin. Sa mga may yara sang intensiyon nga magbulig, mahimo lamang nga makig-angut sa cellphone number 09203053173.
