Sarangani Province—Magsugod na musunod semana una mag-MunaTo Festival ang marathon budget hearing alang sa sugyot nga annual budget sa Provincial Government sa Sarangani nga maoy pagagamiton sunod tuig Dos Mil Dise-otso (2018).
Kini ang gikumpirma ni Board Member Cornelio “Bobot” Martinez, Jr., ang chairman sa komitiba sa finance sa Sangguniang Panlalawigan sa Sarangani Province.
Isip pagtuman sa proseso nga gilatid sa Republic Act Number 7160 kon the Local Government Code of 1991, kinahanglang muagi sa pag-aproba sa Sangguniang Panlalawigan ang usa ka tuig nga budget nga gi-prepara sa executive department gipanguluhan sa gobernador aron legal ang paggasto sa pondo.
Magarbuhong gibalita ni Board Member Martinez nga nidako ang annual budget sa Provincial Government sa Sarangani. Sunod tuig aduna kini annual budget nga P1.147 Bilyon ka pesos itandi sa kasamtangang tuig nga P1.071 Bilyon ka pesos. Dakong tabang ang minilyong umento sa pondo aron makahatag pa og daghang serbisyo ang Sulong Sarangani flagship program ni Governor Steve Chiongbian Solon kauban sila Vice Governor Elmer De Peralta, mga board member, og mga mayores, og sa suporta nila Senador Manny og Congressman Ruel Pacquiao.
Nialsa ang annual budget tungod na usab sa pagdako sa Internal Revenue Allotment kon IRA og sa local income nga naangkon sa panudlanan sa probinsya dala sa mga nisulod nga negosyo og investment, anaa pa ang minilyong pondo alang sa national og foreign-assisted projects.
Oktubre dose (12), gi-submitar ni Governor Solon ang 2018 Executive Budget ngadto sa SP, og naglaum ang komitiba sa finance nga dili mahuman ang tuig mapasa na kini aron magamit imbukada pa lang sa tuig.
Segun ni Ms. Nice Lasalita, Planning Officer III sa Provincial Planning and Development Office, anaa sa P400 Milyon ka pesos ang gitagana sa 2018 Executive Budget para sa development projects maoy muatiman sa nagpadayon nga pagpabarog og mga imprastraktura og pagpalambo sa panglawas, agrikultura, edukasyon, disaster preparedness, tribu, turismo, og kalinaw sa tibuok Sarangani Province.
Sa 2018 proposed budget, adunay gitagana matud pa nga P37.7 Milyon aron magpadayon ang operasyon sa muablihay karong tuiga nga Sarangani Provincial Hospital. (News From Provincial Governor’s Office of Sarangani)
