Davao City – Nagkasabot ang duha ka kabanay nga ila unang limdan si Pamela Pascual nga patay na ang iyang mga ginikanan nga sila Christopher ug Rose ug ang manghud nga si Camille human wala maluwas sa nasunog nilang ba’y sa NHA Buhangin gahapon sa buntag.
Suma ni Crisencia Lauron inahan ni Rose nga nagka-uyon ang ilang mga pamilya nga dili na lang una tug-anan sa tinuod si Pamela nga wala na ang iyang mga ginikanan ug ang iyang manghud hangtud dili pa maayo ug magawas sa burn center sa Southern Philippines Medical Center.
Sigun ni Crisencia nga nabalaka sila nga kun ilang suginlan sa kamatooran si Pamela unya wala pa kini maalim sa nahiagoman nga mga sunog sa lawas basin mag-utong hinoon kini ug mabutang sa delikado ang iyang kinabuhi.
Samtang wala pa masabuti sa matag pamilya kung kinsa ang musagop kang Pamela karon nga nag-inusara na lang kini human nahurot og kamatay sa sunog ang iyang mga ginikanan ug manghud kagahapon adlawa.
Nasayran nga gikatakda ihatud sa katapusang kapahulayan ang magtiayon ug ang anak sa Buhangin Memorial Park karong adlaw’ng Huwebes 1:00 sa hapon.
RadyoMaN Joel Viray
