Davao City – Dili motoo si Buhangin PNP Chief of Police Chief Inspector Jack Tilcag nga dunay koneksyon kang Barangay Communal Kagawad Maalat ang tulo niya ka imbestigador.
Gikunsidera sa hepe nga usa ka intriga lamang ang paglambigit sa tulo niya ka imbestigador kang Maalat kinsa nakumpiskahan og droga sulod sa iyang balay atol sa pagronda sa Philippine Drug Enforcement Agency (PDEA).
Base sa mikatag nga istorya nga gisuwayan sa tulo ka imbestigador nga i-rescue si Maalat apan dihang nakita nga PDEA XI ang nag-operate miatras matud pa ang wala nganli nga mga pulis sa Buhangin PNP.
Giangkon ni Tilcag nga unang adlaw sa iyang paglingkod isip hepe sa Buhangin PNP nakadungog na kini sa sama nga alegasyon apan migula nga walay koneksyon kang Kgd. Maalat ang tulo niya ka imbestigador ug wala usab kini namatikdan nga laing nilihukan kun sinindikato nga binuhatan.
Subay niini, gihagit sa opisyal ang mga nag-intriga nga mupadangat og reklamo kaniya personal o dili ba kaha mupasaka og kaso aron masuta kun tinuod ba o dili ang alegasyon batok sa tulo niya ka imbestigador.
RadyoMaN Joel Viray
