Panay, Capiz – Opisyal na nga ginbuksan ang Christmas Village sa banwa sang Panay kagab-I kun sa diin nangin madinuagon ini. Gindugok sang linibo ka mga tumalan-aw ang tuigan nga kahiwatan sang Local Government Unit sang Panay nga nagahatag sang kalingawan sa mga residente kag mga bisita sa nasambit nga banwa.
Nahibaluan nga tuigan na nga tradisyon sang nasambit banwa nga ang katuyuan amo ang mapabutyag sa tawo ang espiritu sang Paskwa kag pagkatawo ni Ginoong Hesukristo. Nagtambong man sa nasambit nga kahiwatan ang pila ka mga opisyal sang probinsya kasubong man ang madamo nga residente nagikan pa sa mga kaiping nga banwa kag probinsya.
Naghatag sang duag sa amo nga village ang mga nanari-sari nga disenyo sang Christmas lanterns, belen kag mga Christmas lights. Nagpatigayon man sang countdown antes ang pormal nga pagbukas sang Christmas Village kag ginsundan sang madinuagon nga fireworks display kag live band nga naghatag sang kalingawan sa mga tumalan-aw.
Ang nasambit nga Christmas Village ang ginpondohan sang kapin isa ka milyon ka pesos.
