Gipahigayon ang Bukidnon Anti-Poverty Summit 2019 sa dakbayan sa Valencia kaniadtong adlaw nga Biyernes.
Ang mao nga kalihukan gipangunahan ni Senador Juan Miguel Zubiri.
Gitambungan ang BAPS ni DSWD Secretary Rolando Bautista, Minda Secretary Manny PiƱol, mga local officials sa Bukidnon, mga national government agencies head ug representante, mga stakeholders.
Kini ang ikaduhang anti-poverty summit nga gihimo sa Bukidnon ang una, kaniadtong Nobyembre 25, 2016.
Ang BAPS 2019 usa ka follow-up sa gihimong 1st BAPS.
Sa mensahe ni Senador Juan Miguel Zubiri gibutyag niini nga ang anti-poverty summit gihimo sa tumong nga masuta ang mga programa, plano ug interventions aron mabatukan ang kapobrehon sa Bukidnon.
Mahinumduman nga sa Poverty Incidence Survey sa Philippine Statistics Authority kon PSA niadtong 2015, anaa sa ika-upat ang Bukidnon sa pinakataas nga poverty incidence sa tibook nasud nga adunay 54.1 percent.
Apan sa 2018 survey, niubos sa 22 percent ang poverty incidence sa probinsya o gikan sa 54. 1 percent kaniadtong 2015 niubos kini ngadto sa 32. 1 percent nga nagbutang sa Bukidnon sa ika-19 nga ranggo.
Ang mao nga datus pinaka-ubos sukad kaniadtong 2006 base sa gihimong survey sa PSA kaniadtong 2006, 2009, 2012, 2015 ug 2018.
Gikalipay usab ni Senador Zubiri nga wala na na-apil ang Bukidnon sa top ten poorest provinces.
