Gibakunahan na si Bukidnon Provincial Governor Jose Ma. R. Zubiri Jr., batok sa COVID-19 gamit ang bakunang Oxford AstraZeneca sa may alas dos ang takna sa hapon, kagahapong adlawa, Mayo 12, 2021 sa Malaybalay City Enhanced Screening Area (COVID-19 Vaccination Site), Malaybalay City, Bukidnon.
Mismo si Provincial Health Officer Dr. Gary Guido C. Tabios ang mipahigayon sa pagtupok sa unang dose sa bakuna ngadto sa gobernador diin pinaka dali og wala na mabantaye sa gobernador nga nahumana na kini og tupok kaniya.
Human sa pipila ka minuto gikan sa pagtupok diin kini gi-obserbahan sa presenya nila Development Management Officer V, Dr. Vincent C. Raguro sa Provincial DOH-Bukidnon Office og City Health Officer, Dr. Dennis P. Sangalang sa syudad sa Malaybalay, nilakaw si Governor Zubiri nga walay kakulian og bisan gamay nga negatibong reaksyon sa iyang panglawas.
Sa gihatag nga impormasyon ni Dr. Raguro, sa pagka karon adunay 6,498 nga alokasyon sa Oxgord AstraZeneca vaccine alang sa lungsod sa Manolo Fortich, Quezon, Don Carlos, Maramag, Impasugong og Cabanglasan lakip na ang syudad sa Malaybalay og Valencia diin gitumbok nga anaa sa 1,625 ka mga senior citizen ang paga-bakunahan matag adlaw sugod kagahapon hangtud sa ika-upat nga adlaw.
Gilauman nga human sa pag bakuna ni Governor Zubiri magsunod na ang tanan nga mga senior citizens sa Bukidnon aron sila ma proteksyonan usab sa COVID-19.
