NAHILAKIP ang Probinsya sa Bukidnon sa mga gipasidunggan sa Department of Agriculture, pinaagi ni Agriculture Secretary William Dar, isip usa sa pito (7) ka mga probinsya sa tibuok nasud nga nakadawat sa Category A nga pasidungog sa 2019 Rice Achievers Awards, bag-o lang pinaagi sa virtual awarding didto sa kaulohang Maynila.
Sa maong virtual awarding, ang Category A mao ang mga probinsya sa nasud nga nakakuha sa 4.0 nga minimum metric tons nga Rice Production Growth, diin ang Bukidnon nakatala sa 469,468 metric tons, subay sa data sa Philippine Statistics Authority (PSA), alang sa tuig 2019 nga datus nga gi-award ning tuig 2020. Kauban sa Bukidnon nga napasidunggan sa maong kategoriya ang mga probinsya sa Nueva Ecija, Bulacan, Ilocos Norte, Isabela, ug Cagayan.
Tungod niini nga kalambuan, midawat ang Probinsya sa Bukidnon, pinaagi sa Provincial Agriculture’s Office, ug ₱4,000,000.00 cash rewards nga nahan-ay na usab alang sa pagpalit sa farm machineries with implements aron magamit sa rice farmers sa probinsya.
Sa tuig 2019, numero uno nga rice producing province ang Bukidnon sa rehiyon sa Northern Mindanao, diin nakatampo kini sa kinatibuk-ang 61.6% nga kadaghanon sa supply sa bugas sa rehiyon ug anaa sa 2.5% usab sa kadaghanon sa supply sa tibuok nasud.
