NAGPABILING luwas o anaa sa “Free Zone” ang probinsya sa Bukidnon gikan sa hulga sa African Swine Fever (ASF), kini base sa pinakaulahi nga African Swine Fever Zoning Status sa Department of Agriculture – Bureau of Animal Industry subay sa National ASF Zoning and Movement Plan nga gipagula pinetsahan Mayo 10, 2021.
Sukad sa pagkuyanap sa maong virus, nagpabiling mabinantayon og alerto ang probinsya pinaagi sa hugot nga seguridad diha sa 13 ka mga Provincial Veterinary Sanitation Checkpoints. Dugang niini, mas gipahugtan pa ang active surveillance aron diritso maaksyonan ang hulga sa ASF diha sa kabarangayan, ilabi na sa mga utlanang lungsod sama sa Manolo Fortich, Baungon, Talakag og uban pa.
Gi-awhag usab sa Provincial Task Force on Infectious and Contagious Animal Diseases (PTF-ICAD) sa Bukidnon ang katawhan nga padayong mosunod sa gipagula nga Executive Order No. 35 ni Provincial Governor Jose Ma. R. Zubiri Jr. nga temporaryong nagdili sa pagpasulod sa mga binuhing baboy, karneng baboy ug mga produkto nga gama sa karneng baboy nga naggikan sa kasikbit nga mga probinsya niini sa tibuok nasud.
Padayon usab ang pagsabwag ug mga pahimangno gikan sa buhatan sa Provincial Veterinary ngadto sa tanang katawhan pinaagi sa pagpahigayon ug Information & Education Campaign (IEC)-Seminar, paghatag kasayuran sa online sellers pinaagi sa private message, pagpahigayon ug rekorida diha sa kalungsuran, pagpagawas ug recorded announcement sa mga Bus Terminal og mga istasyonan.
Samtang, giaghat usab ang tanang nagbuhi ug baboy nga magpalista og magpa-enroll sa Registry System for Basic Sectors in Agriculture (RSBSA) nga mao ang basihan sa ayuda nga ihatag sa Department of Agriculture sa panahon nga adunay mahitabo nga culling kung magpositibo sa ASF ang ilang lugar. Gawas niini, ma-insured na usab ang ilang binuhing baboy sa PCIC-Livestock Insurance nga libre sa gobyerno.
Kahinumduman nga mikuyanap sa nasud ang maong virus sa tuig 2019 kung aha nakahatag kini ug dakong kabalaka og hagit ngadto sa mga namuhi ug baboy ilabi na ngadto sa mga konsumante tungod sa kalit nga pagtaas sa presyo niini ilabi na diha sa mga kamerkaduhan.
