NAGPAHINUMDUM ang buhatan sa Bukidnon Provincial Agriculture Office sa pagpanguna ni Engr. Alson G. Quimba pinaagi sa Farmer’s Information and Technology Services (FITS Bukidnon) ngadto sa mga mag-uuma sa probinsya ilabi na sa pagsulod sa panahon sa tag-init nga magsugod sa bulan sa Mayo 2021 nga mag-amping diha sa ilang pagtikad ug paghimo sa buluhaton sa uma.
Sa impormasyon nga gibutyag ni Provincial Agriculturist Engr. Quimba nga dinhi sa probinsya sa Bukidnon nabutang kita sa type 4 nga klase sa klima diin buot pasabot nga bisan sa panahon sa tag-init, makatagamtam gihapon kita ug mga pag-ulan bisan pa man taas ang panahon sa tag-init. Tungod niini, aduna gihapon panahon nga makatanum ang mga mag-uuma.
Gitambagan sa maong buhatan ang mga mag-uuma nga dili kalimtan ang pagsuot sa kalo, magdala ug dugang sinina ug kanunay’ng magdala sa ma-inom nga tubig aron dili ma-dehydrate o mamalhan. Likayan usab ang kanunay nga pagpainit ug magpasilong kung gikinahanglan.
