Gindagsa ang Buliganay (community) Pantry sa Koronadal City kagaina sang aga nga ginpatigayon malapit sa roundball sang syudad. Suno kay Ian Parcon, Communication Officer sang team nga wala nila ginaekspektar ang kadamuon sang tawo nga nagkadto nga alas 4 pa lang kagaina sang aga madamo na ang nagpila amo nga alas 8:00 kaina ubos na ang ila nga supply . Naglab-ot suno pa sa 800 ang nagkadto nga halin sa mga nagkalain-lain nga barangay sa syudad sang Koronadal. Samtang suno kay Parcon magapadayon ang “Buliganay pantry” sa syudad tubtob nga may-yara sang maghatag sang donasyon. Apang umpisa bwas nga adlaw, Abril 23 magaumpisa na ang ila nga community pantry alas 3:00PM tubtob alas 6:00PM. Panawagan sini sa tanan nga maghatag base sa makaya kag magkuha base naman sa mga kinahanglanon kag kon mahimo ang nagakinahanglan gid. Paklaro ni Parcon nga ang community pantry nila ang indi pagusto magkuha kundi may sistema sila nga ginapatuman nga ang volunteers lang ang maghatag sang item base sa ginpili sang recipients. Istrikto man suno sa iya nga ginapatuman ang health protocols.
