Davao City – Dut-an og reklamo: Kini ang bahad sa usa ka amahan kinsa taxi driver ngadto sa usaka maestro sa Daniel R. Aguinado National High School (DRANHS) kay mao kini ang nakaingon kun nganong misulay og pagpakamatay ang iyang anak nga 18 anyos ug Grade 12 sa maong tulonghaan.
Tumang kasuko ang gibati sa abgrabyadong amahan ngadto sa maestro dihang nasayran nga gi-bully niini ang anak pinaagi sa pagsulti nga bagsak na kini sa subject busa wala nay rason aron mo-eskwela pa ang maong estudyante.
Saysay sa amahan nga sa wala pa mahitabo ang maong insidente, nabantayan na niini nga luya ug hilom sa ulahing mga adlaw ang anak ug kung pangutan-on kini sa problema, walay laing bukambibig sa dalaga mao ang iyang maestro.
Suma sa amahan, ginapatinda sulod sa DRANHS sa maong maestro ang anak diin 20% sa ginansiya ginapangayo sa maestro diin daku ang pagtoo sa amahan nga dinhi tanan nagsumikad ang problema sa iyang anak.
Matud sa amahan, nagsugod ang kasuko sa maestro ngadto sa iyang anak human nga wala kini makaluto ug makatinda kay nahutdan sila og LPG ug timing usab niadtong panahona nga wala silay salapi.
Didto na giipit ug ginapalisod sa maestro ang batan-on pinaagi sa dili pagpirma niini sa clearance sa maong estudyante nga nagpadismaya og maayo sa dalaga sulod na sa pipila ka adlaw.
Ug ang gikasakit pa og maayo sa biktima mao ang pagpunay og sukmat sa maestro sa batan-on kun nganong mi-eskwela pa man kini nga bagsak naman kini sa iyang subject nga Entrepreneurship.
Bandang alas-3:00 sa kadlawon sa miaging adlaw, pagbangon ni amahan aron mangihi, maoy misugat sa duha niya ka mga mata ang nagbuy-od nga lawas sa iyang anak sa kusina sa ilang balay sa may Matina.
Daling gidala sa Southern Philippines Medical Center (SPMC) ang biktima diin nasuta sa attending physician nga nag-inom diay kini og pesticide apan maayo na lamang gani kay nasalbar pa ang kinabuhi niini.
Giklaro sa amahan nga dili tungod sa pagbuntis og tulo ka bulan ang hinungdan sa pagsulay og hunos sa dalaga kay gani ang lalake pa ang nagsige og apura sa maestro nga pirmahan na ang clearance diin kini timaan nga wala mobalibad sa tulobagon ang nakapamabdos sa iyang anak.
Nanganti ang amahan nga dili niya lung-an hangtod masilotan ang gi-alleged nga ‘bully teacher’ aron kahatagan og leksyon ang maong maestro aron sa ingon, wala na’y lain pang estudyanteng mabiktima sama sa gidangatan sa iyang anak.
RadyoMaN Joel Viray
