Matud ni Bunawan PNP Chief of Police Major Robel Saavedra nga sukad sa iyang paglingkod isip hepe sa maong istasyon, wala silay natalang dunay pasaherong babaye ang gipusgay sa habal-habal driver sa Barangay Ilang busa nagtoo si Saavedra nga posible nga dili sa iyang panahon inay sa nakalabay pang hepe natigayon ang lugos.
Giluwat ni Saavedra ang maong pagtataw nunot sa gihimo karon nga lakang sa Barangay Ilang sa pagpamilit og sticker sa mga habal-habal ug pagpanubay sa kadtong driver nga giingong nanglugos og iyang pasahero.
Suportado sa kasamtangang hepe ang aksyon karon sa mga opisyal sa Barangay Kay pinaagi sa sticker diin dali ra unya mailhan sa mga pasahero hilabi na sa mga kababainhan, ang mga driver nga muhimo og daotan ngadto sa ilang mga pasahero.
Kabahin sa pagahimoong lakang karon sa Bunawan PNP mao ang pagbansay sa mga volunteer sa matag Purok kon unsaon pag-patrolya ug pagpatuman og seguridad alang sa ilang katawhan panahon sa kagabhion sanglit dili makaya sa 70 ka pulis ug auxiliary ang paghatag og siguridad sa kapin 150 mil ka residente sa entero Distrito sa Bunawan.
Sa katapusan, tambag ni Major Saavedra sa kababainhan nga maka-uli og gabii nga musakay lang og habal-habal nga kaila nila ang mga driver aron dili sila matumpawak sa kalautan sa mga kriminal nga mga habal-habal driver.
RadyoMaN Joel Viray
