Davao City – Patay ang usa ka ginang human nakabangga ang gisakyan nga van sa kilometros 25 Bunawan bisperas sa mga minatay.
Nakabsan sa kinabuhi human gitambalan sa Southern Philippines Medical Center si Nenita Tomada, hamtong ang pangidaron ug residente sa Bago Gallera ning siyudad.
Nadala sab sa ospital apan nakagawas dayon human natambalan sila si Rosandy Acosta, Selah Mae Joy Acosta, Jessie Jay Esperis, Princess Sofia Rose Acosta, Julina Esperis, Jade Katawanan, Jaymark Esperis, ug laing tulo ka biktima sa duha ka motorsiklo.
Sumala ni Bunawan PNP chief of police Chief Inspector Boyet Ramiso nga gikan mi-duaw sa lubnganan sa ilang kabanay sa sementeryo sa Davao del Norte ang mga biktima.
Matud sa driver sa van nga si Larry Esparis ug bayaw sa namatay nga wala niya mabantayi ang motor dihang mitipas kini sa laing lane nga paingon sa Davao del Norte hangtud nadaro niini ang duha ka motor.
Sa kakusog sa impact pulos nangamlaba sulod sa van ang mga biktima.
Nagrabehan si Nenita human nga iyang gi-gakos ang uno anyos aron dili ma-unsa ang bata bayad sa iyang kinabuhi.
Reckless Imprudence Resulting to Homicide, Multiple Physical Injuries ug Damage to Property ang atubangon nga mga kaso sa driver sa van.
RadyoMaN Joel Viray
