Davao City – Ipahigayon sa Bureau of Fire Protection (BFP) ugmang adlawa, Marso 1, 2019 o unang adlaw sa Fire Prevention Month ang fire safety awareness campaign pinaagi sa motorcade o recorida dinhi sa syudad sa Davao.
Sa pakighinabi sa DXDC RMN Davao kang BFP Intelligence and Investigation section chief senior fire officer (SFO) 3 Ramil Gillado, gibutyag niini nga sugdan ang maong kick-off ceremony sa Davao City Fire District ground alas-5 sa buntag kauban ang mga personahe sa BFP diin mutuyok kini palibot sa syudad sa pagpahibalo sa katawhan sa kampanya kontra sunog.
“Karong March 1 naa tay kick-off ceremony tapus naa tay motorcade nga pagabuhaton para at least i-aware nato ang atoang katawhan diri sa syudad sa Davao nga nag start na ang pag-observe nato sa Fire Prevention Month.” pagpahibalo niini.
Dugang pa ni Gillado, manghatag usab sila og mga leaflets sa mga kabalayan asa nakabutang ang mga angay buhaton aron makalikay sa insidente sa sunog.
Gibutyag sa opisyal nga human niini, gilayong sugdan sa BFP ang pagpahigayon sa mga nakalinyadang aktibidad sama sa pagbansay sa matag barangay sa pagresponde sa sunog ingon man pagpahigayon og inspection sa mga business establishments aron malikayan ang maong insidente.
RadyoMaN Kirby Manzon
