Dos man cuniao ya muri despues el motosiclo ta munta sila yan bangga con el bus na highwau del Cabaluay del Myercoles denoche.
El maga victima amo canda Jayson Juanito y Delos Santos y su cuniao si Ramillano Delos Reyes y Perez, ambos de Lumbangan.
Na report del Sangali Police Station ta aparese serca man alas siete del noche cuando ta byaja el man cuniao desde este para weste cuando de llegar na Cabaluay, ya entra estos na otro lao del calsada donde atiempo ta pasa tambien el bus del Rural Transit ta maneja si Henry Penticase y Omandam encamino para na Sibugay.
Porcausa deste, yan bangga canila el bus y ya segue pa estos man guyut na calsada.
El tsuper del XRM motorsiclo si Juanito ya muri dayun na lugar del accidente mientras con Delos Reyes ya puede pa lleva na hospital pero ya declara con este dead on arrival el maga doctor.
El tsuper del bus y el dos vejiculo ya lleva na estacion del pulicia.
