Duna na unya’y masakyan nga mga bus ang mga commuter o pasahero gikan sa Cebu South Bus Terminal kun CSBT sa habagatang bahin sa Sugbo paingon sa bag-ong Terminal 2 sa Mactan-Cebu International Airport kun MCIA sugod sunod buwan .
Segun ni CSBT Manager Joey Herrera nga ang mga bus sa Sugbo Tours mihimo na og dry run alang sa maong byahe diin gipanglantawan nga mopabiyahe sila og upat ka mga bus subay sa maong rota nga dunay pletehan nga 40 (kuwarenta) pesos lang .
Dugang niini, dunay unom ka mga lokasyon ang hunongan sa maong mga bus nga mahimong mo-pick up og mga pasahero ug dunay minimum nga pletehan nga 25 (baynte-singko) pesos lang .
Mahimong mohunong ang mga bus sa Island Mall duol sa airport, Pacific Mall sa dakbayan sa Mandaue, Cebu North Bus terminal, Robinsons Galleria, Robinsons Fuente, ug dayon sa CSBT .
Ang maong mga bus tuyong ipabiyahe sa naasoy’ng rota aron madala ang mga pasahero nga gustong mopahimos sa bag-ong terminal sa MCIA sa mas barato lang nga pletehan .
