Bus operators nihangyo’ng tugotan ang pag-pick up og pasahero nga layo sa DCOTT

Davao City – Ipaabot karon sa management sa Davao City Overland Transport Terminal (DCOTT) ang hangyo sa pipila ka mga bus operator nga tugotan ang pagpasakay og pasahero sa pipila ka mga area nga layo kaayo sa terminal.

Sa interbyu sa DXDC RMN Davao kang Aiza Usop, DCOTT manager, gibutyag niini nga makigpulong sila sa Public Safety & Security Command Center (PSSCC) kabahin sa maong hangyo diin sila usab ang makahatag og desisyon ug kung kini ilang aprubahan.

“(Ang) bus operators nagahangyo pud sila kung mahimo, pwede sila maka-pick up ilabi na aning atoang mga lagyo nga area like the Toril, Calinan, Buhangin. In fact, mulo pud na sa atoang mga pasahero,” sulti ni Usop.

Gipanawagan ni Usop sa mga pasahero nga sa pagkakaron, tumanon ang direktiba o ang pagsuspende sa pagsakay sa bus stops sa dakbayan tungod sa seguridad batok sa mga pagpamomba.

Samtang, padayon usab karon ang pag-monitor ug pagpanakop sa Land Transportation Franchising and Regulatory Board (LTFRB-XI) sa mga bus nga makalapas sa maong kamandoan.

RadyoMaN Kirby Manzon