Top 2 drug personality sa Davao City nisukol-patay sa buybust

86
Davao City – Patay atol sa gilusad nga buy-bust operation ang ang giilang top 2 drug personality sa kapulisan.

Sa interbyu sa DXDC RMN Davao kang Police Major Jake Goles, Sta.Ana Police Station Chief, nisangpot sa madugo nga engkwetro ang gilusad nga buy-bust operasyon batok sa suspek nga giilang si James Noel Cayme Lopez, alias “JOK JOK”sa Purok Salvacion, Brgy. Agdao Proper, Davao City.

Matud ni Goles, malampusong napalitan sa pulis nga nagsilbing poseur buyer, ang suspek og shabu nga nagkantidad sa P500.00, apan dihang nagpaila na ang pulis ngadto sa suspek inay musumite sa iyang kaugalingon nibunlot kinig armas ug gipabuthan ang pulis.

Nidepensa ang back-up nga pulis ug naigo nila ang suspek sa iyang lawas. Nisulay pa og sibat ang suspek ug nagpabuto sa ikaduhang higayon matud ni Goles nibalos na usab og pabuto ang mga awtoridad hinungdan nga natumba kini sa alley sa nasangpit nga lugar.

Gidala sa SPMC aron masalbar pa ang suspek human makahiagom og mga igo sa kalawasan apan nakabsan na kini sa iyang kinabuhi samtang ginatambalan.

Narekober sa SOCO team sa pagpanguna ni PCMS Sherwin Valmores sa crime scene, ang usa ka .45 caliber pistol STI International Inc. with serial number 143925 nga loaded og 3 ka mga bala, mga basiyo sa bala, shabu nga mobalor sa P12,000 ug uban pang mga ebidensiya.



Matud ni Goles, nalambigit si alyas “Jok Jok” sa mga pagpayuhot og illegal nga droga sa Brgy. Agdao Proper ug kasikbit nga Barangays base sa rebelasyon sa Barangay Intelligence Network nga gipadangat sa kapulisan.

RadyoMaN Aimee Guinita

Facebook Comments