TACLOBAN CITY – Tulo an patay samtang tulo naman an samaran matapos bumunggo an usa nga pampasahero nga bus ha nakaparada nga truck ha bungto han Lupi, Camarines Sur kakulop, October 30.
Sumala ha report han Brigada News, ginkilala an mga namatay nga hira Adrian Segue, 20 anyos, may asawa, taga Samar; Anacleto Golingan Jr., 70 anyos, may asawa, residente ha Caloocan City; ngan usa nga babayi nga ginkilala la ha ngaran nga Edith.
Samaran naman hira Carlito Labong, 43 anyos, may asawa, residente ha Catbalogan, Samar; Rodmer Bares; 23 anyos, taga Catbalogan, Samar ngan Rina Bohol, 27 anyos, residente ha Catbalogan Samar.
Subay han imbistigasyon han Lupi PNP, alas 2:30 han kaagahon han matabo an aksidente. Tikang daw an Elavil bus nga may plate number nga TYX-418 ha Samar tipakadto ha Manila.
Nasilaw daw an driver han bus ha katapo nga sarakyan amu nga ginkabig hini an iya pagmamaneho pabalik ha dati nga lane rason nga nabunggo ini ha nakaparada nga dump truck.
Tungod han makusog nga impact, nakunot an syahan nga parte han bus nga baga hin delata o saging nga ginparutan.
Samtang, aada na ha kustodiya han PNP an driver han Elavil bus nga hi Reden Alday, 44 anyos, may asawa, residente han Brgy. Calagbangan, Sipocot ngan yana maatubang hin kaso nga reckless imprudence resulting to multiple homicide ngan serious physical injury.
