Davao City – Kapin na 300 ka biyahe sa bus ang matala matag adlaw sa Davao City Overland Transport Terminal (DCOTT).
Sa interbyu sa DXDC RMN Davao kang Aiza Usop, Manager sa DCOTT, gibutyag niini nga misaka ang ihap sa bus trips human nga gipailawom ang syudad sa Davao sa General Community Quarantine (GCQ) status.
Matud ni Usop, mas taas kini kung itandi sa 200 bus trips matag adlaw nga natala panahon sa Modified Enhanced Community Quarantine (MECQ), apan gibutyag niini nga padayon gihapon nga ginapatuman sa DCOTT ang minimum public health standards batok Coronavirus Disease 2019 (COVID-19).
“Atoang namatikdan gyud karon nga nagbalik napud ‘ta sa GCQ nga medyo nagkadaghan-daghan napud ang bus trips nato nga nagabiyahe. But of course, atoa lang gihapong gina-implement ang mga health protocols nga naa sa atoang guidelines,” sulti ni Usop.
Matud sa DCOTT Manager, padayon gihapong ginapatuman ang limitadong kapasidad sulod sa bus aron mapatuman, ang social distancing ug malikayan ang risgo hatud sa COVID-19.
RadyoMaN Kirby Manzon
