Malaybalay City, Bukidnon – Todo depensa karon ang Bukidnon Second Electric Cooperative kon BUSECO nga dili maka-apekto sa balayrunon sa kuryente ang pagbaton ug Bukidnon Sub- Transmission Corporation kon BSTC.
Nasayran nga ang BSTC natukod pipila ka tuig na ang nakalabay nga iya sa BUSECO ug sa FIBECO.
Sa interview sa RMN Malaybalay ngadto kang Ethel Marie Ombina, OIC-Corporate Planning and Utility Economics Department sa BUSECO gibutyag niini nga dili makapasaka sa rate ang BSTC.
Gipasabot niya nga kung kaniadto nga wala pa ang BSTC, ang NGCP mao ang nag-operate ug nag-maintain sa linya.
Aduna matud pay connection charge ug residual sub-tranmission charge apan tungod kay na-turn over na kini gikan sa NGCP ngadto sa BSTC, ang BSTC na ang nagkolekta sa mao nga bayrunon.
Kung mahinumduman usab matud pa sa nakalabay nga tuig, adunay wala gibayaran ang BUSECO sa BSTC tungod sa bangi, apan nasulbad na kini.
Matud ni Ombina nga sugod niadtong Pebrero 2017 hangtod sa Agosto karong tuiga nagbayad ang BUSECO ug arrears sa BSTC ug kung mahuman na kini mawala na ang gibayrang 14 centavos ug mubalik na ang kanhi rate susama kaniadtong ang NGCP pa ang nag-operate sa Aglayan-Kibawe 69 KV line.
