Davao City- Gikansela na sa Philippine Coast Guard Davao ang tanang biyahe gikan Davao City ngadto sa Island Garden City of Samal (IGACOS) tungod sa bagyong Vinta.
Segun ni PCG Davao Station Commander George Maganto nga sugod kaganihang alas 3:30 sa hapon wala nay matugutang mubyahe nga mga ferry boats, lantsa ug mga gagmayng bangka.
Gipailawom na sa tropical cyclone warning signal #2 ang Davao Region bandang alas 2:00pm.
Gi-abisuhan usab ang mga tag-iya sa mga beach resorts sa dakbayan sa Davao ug sa Samal nga dili na tugutang mangaligo og dagat ang mga guests kung kusog na ang balod sa dagat aron malikayan ang mga insidenteng pagkalunod.
Giawhag ni Maganto ang publiko nga motuman sa mga advisories aron malikayan ang mga casualties sa pagdaut sa panahon.
Sa pikas bahin, nakaalerto usab ang Eastern Mindanao Command (EASTMINCOM) sa pagsulod sa bagyong ‘Vinta.’
Segun ni EASTMINCOM spokesperson Maj. Ezra Balagtey nga gimanduan na nila ang tanang mga units partikular na niadtong apektado sa bagyong ‘Vinta’ nga makig-koordinar sa nagkadaiyang mga local Disaster Risk Reduction Management Councils (DRRMC) sa himuong disaster response.
Gipreparar na usab sa militar ang kagamitan nga magamit sa emerhensya susama sa mga floating, flying ug mga heavy equipment alang sa malampusong pagresponde sa mga maapektuhan unya sa bagyo.
RadyoMan Aimee Guinita
