General Santos City—Gihingusgan ni Civil Aviation Authority Of The Philippines kon CAAP General Santos Manager Edgardo Cueto nga musunod lang sila sa unsa mang imando sa balaud kabahin na sa reklamo sa mga taxi operators sa pagsulod sa usa ka bus company sa General Santos City International Airport nga miresulta matud pa nga nakuhuran ang ilahang pasahero.
Sumala pa ni Cueto nga atol sa gihimong consultative meeting nga ilang gipahigayon, buot sa mga taxi drivers sa Gensan nga nagabyahe sa airport nga ipakansela ang prangkisa sa Yellow Bus Line ug ubang mga tourist service nga nagakuhna ug pasahero gikan sa airport padulong sa South Cotabato.
Sumala ni Cueto nga kung imando matud pa sa Land Transportation Franchising Regulatory Board kon LTFRB nga tang-tangon ang maong mga tourist service sa airport ilaha lang usab kining tumanon ug pahawaon ang mga nahisgutan.
Dugang pa niini nga sila sa CAAP ang walay kontrol sa mga prangkisa sa mga nagabyahe sulod sa airport, sanglit naghatag lang matud pa sila ug permit sa mga Bus sa dihang mi-apply sila sa buhatan sa CAAP dala ang ilahang mga franchise gikan sa LTFRB ug uban pang dukomento hinungdan nga ilahang gitugutan.
Nag sugod lang matud pa ang pag sulod sa ubang tourist service sa airport human ang serye sa mga meeting nga ilahang gipahigayon aron nga mas mamahimong accessible ang airport sa mga torista ingon man sulbaron ang nahimong pag-abusar sa mga taxi driver kaniadto sa mga toristang pasahero. (Dave Silagan)
