Davao City – Gi-awhag karon sa usa ka environmental watchdog organization nga Kinaiyahan Foundation ang tanang local government units (LGUs) sa tibuok nasud-Pilipinas nga sagopon ang geo hazard maps nga nakumpleto kaniadto pang 2014 aron mahimong epektibong giya sa pagplano kun pagpanday sa mga Comprehensive Land Use Plan sa nagkadaiyang lokalidad.
Gipasabot ni Kinaiyahan Executive Director Betty Cabasares nga pinaagi niini, maprotektahan ug malikay ang katawhan ilabi na ang mga lumulupyo sa landslide-prone areas sama sa nasinati sa Guinsaugon, Leyte diin kapin 1,500 ang napatay ingon man sa bag-ohay pa lamang nga landslide sa Naga City, Cebu diin kapin 50 na ang na-rekober nga patay’ng lawas sa nagapadayong search, rescue and retrieval operations.
Gumikan niini, dakung uyon karon si Cabasares nga maapil diha sa mga ordinansa ang pagbutang sa mga geo hazard maps diha mismo sa mga municipal halls haron masuheto ang mga residente sa delikadong lugar sa ilang tagsa-tagsa ka mga barangay ug kun asa mopaingon kun gikinahanglang mobakwit panahon sa kalamidad.
Sa pikas bahin, gi-angkon sa Executive Director sa Kinaiyahan nga daku ang mawala nga revenues sa gobyerno kung maundang ang pagmina sa mga metallic ug non-metallic minerals apan angay usab ikonsidera kung pila ang masalbar sama sa limpyo nga tubig ug mas luwas nga kinaiyahan.
“For me, wala gigamit ang geo hazard map sa pag-approve sa mining applications maong kinahanglan i-stop na siya para ma-review,” matud ni Cabasarez kinsa nihisgot usab sa kamahinungdanon sa aksyon kontra climate change.
“Magkapit kamay na ang mga private organizations, communities, government agencies, para sa pag tubag sa flash floods, landslides ug uban pang kalamidad,” hinapos nga hagit sa maong opisyal.
Kahinumdoman nga mismong si Pres. Rodrigo Duterte nipadayag na sa iyang dakung tinguha nga seryosong tun-an sa Kongreso ang total mining ban ilabi na sa gitawag nga open pit mining scheme gumikan sa mapait natong eksperyensya sa Benguet ug Naga Cebu.
RadyoMaN Jason Amisola
