El maga personajes del Police Station 8 bajo na mando di P/SINP Daniel Taub ya puede ya establise el identification del cadaver del un mujer que ya puede recubri na drainage emfrente del Pitogo Alliance Church na barangay del Sinunuc endenantes pasao alas sinco del aga.
Con el victima ya que ya puede identifica por medio del su School Identification Card ya nombra como si MARJORIE C. ROMULO, antes estudyante del Saint Vincent College na ciudad de Dipolog y ya queda un “entertainer” asegun del cuantos “club” aqui na ciudad de Zamboanga por mas de un año ya.
Mismo el maga personajes Police Station-8 (Sinunuc) el ya anda verifica na un pension locao na barangay Sta Maria en este ciudad donde ta esta el victima antes pa con este ya recubri muerto. Donde ya puede sila recubri cuantos maga galamiton del victima incluhido ya el de este School ID , gulusinas, tres bote de un refresca, y un calsonsillo (male underwear) indication asegun que posible tiene compañero el victima na de este cuarto.
Ta aparece tambien na investigacion del maga otoridad que el victima ta dale asegun informacion con cuantos maga police sobre identification del cuantos maga personalidad que imbuelto na droga prohibido que ya resulta na de estos aresto.
Mientrastanto, ta continua pa conduci hondo investigacion el maga police paraber puede determina quien el posible responsable na matansa del victima y el de este aresto.
