CAFGU gipusil patay sa gitohoang NPA
Patay ang usa ka sakop sa CAFGU human gipusil sa tulo ka mga lalaki atol sa “market day” sa Barangay Linantoyan sa Guihulngan City , Negros Oriental kagahapon , Enero 6 .
Ang biktima nailhan nga si Joseph Gabia Silvano 39 anyos sakop sa Cafgu nga nadestino sa detatchment sa ARMY sa maong barangay .
Matud ni PO3 Cecile Mingay , imbistigador sa Guihulngan Police Station, samtang nagbantay sa daghang mga tawo tungod sa tabo ,kalit nga gidool si Silvano ug tulo ka mga lalaki ug gipusil siya niini , ug naigo sa lain laing bahin sa lawas .
Napagan usab ang usa ka lalaki nga ginganlan ug Janno Carpio Pasina sa walang bahin sa iyang tiil .
Base sa nakuhang mga kabhang , kalibri 45 sa armas ang gigamit sa pagpusil sa biktima .
Wa isalikway sa kapolisan nga mga sakop sa New People`s Army (NPA) ang nitira sa biktima .
Apan gisusi usab sa kapolisan kung wa bay personal nga kaaway si Silvano nga posibling responsabli sa krimen .
