Gikonsiderang generally peaceful sa Bukidnon Provincial Police Office kon BPPO ang tibook paghandom sa semana santa sa probinsya.
Sa interview sa RMN Malaybalay ngadto kang Police Captain Jiselle Longakit, ang spokesperson sa PNP Provincial Command gibutyag niini nga walay mga natalang unsamang insidente sa probinsya sa Bukidnon hinungdan nga ilang gikonsidera nga usa ka malinawong paghandom sa semana santa karong tuiga.
Sa karon tutukan na usab sa kapulisan ang pabantay sa seguridad alang sa nagsingabot nga eleksiyon sa Mayo 13 ning tuiga.
Samtang sa habig sa kasundaluhan, ilang gikasubo ang pagkamatay sa usa ka CAFGU Active Auxillary (CAA) nga si Jovane Bravop Salisi human giharass sa grupong New Peoples Army kon NPA ang bag-ong gimontar nga Patrol Base nga nahimutang sa Barangay New Eden, lungsod sa Pangantucan kaniadtong Sabado sa buntag, Abril 20 ning tuiga.
Si Salisi 21 anyos nga taga Brgy. Portulin, Pangantucan ug kinamanghuran sa 4 ka mga magsoon.
Matud ni Capt. Ryan Layug, ang CMO ug spokesperson sa 403rd Infantry Brigade sa interview sa RMN nga gawas sa mao nga panghitabo wala na usa’y laing engkwentro atol sa semana santa.
