Cagas: MGCQ angay sa 1 month community quarantine

Davao City – Dili tanang klasipikasyon sa karantina ang haom sa usa ka bulan nga implementasyon sanglit ang matag karantina dunay iyang kaugalingong hulagway, health protocols policy, dagan sa ekonomiya, ug epekto sa panginabuhi sa mga tawo depende sa gidaghanon sa kaso sa COVID-19.

Dakong disbentaha sa ekonomiya ug sa trabaho ang Enhanced Community Quarantine (ECQ) dili sama sa General Community Qauarantine (GCQ) nga luag ang palisiya samtang sa Modified General Community Qauarantine MGCQ, daghan sa mga industriya ang makabalik na sa operasyon ug makagawas na sab ang mga kadaghan sa mga empleyado aron manarbaho.

Kung si Davao Del Sur Douglas “Dodo” Cagas ang pasultihon, dili gayod maayo nga padugayon ang ECQ tungod sa negatibong hampak niini sa ekonomiya diin ang makaluluoy mao ang katawhan mismo.


Segun ni Governor Cagas, ang pondo sa ilang probinsiya nahubas gumikan sa pagtabang sa mga naapektohan hinungdan sa problema kung asa sila mukuha og kwarta aron isustinar sa pag-ayuda sa ilang katawhan sa probinsiya.

Gitataw sa Gobernador nga wala siya’y problema ug gani suportado niya ang lakang sa Inter-Agency Task Force sa pagpatuman og mas taas nga karantina basta kung kini Modified General Community Quarantine ug dili ECQ.

“Dakong tabang gyod (30 days community quarantine) basta i-maintain lang ang health protocols,” matud ni Cagas.

Dugang niini nga importante kaayo nga maablihan ang mga industriya sa negosyo sa taas nga panahon aron sa ingon makabangon dayon gikan sa pagkahugno ang ekonomiya ug nga makabalik sa trabaho ang katawhang pilipino nga sa karon naglisod na og taman tungod sa krisis nga dala sa COVID-19.

Busa gipalanog ni Cagas ang iyang panawagan sa publiko nga tumanon sa kanunay ang health protocols nga gitakda sa MGCQ aron dili matakdan sa kagaw ug masanta ang pagdaghan sa kaso sa COVID-19 sa atong dapit nga karon usa na ka bulan ang karantina.

RadyoMaN Joel Viray

Facebook Comments