Cagayan de Oro City Jail – Male Dormitory, gideklarang drug free

Gihatag na sa Philippine Drug Enforcement Agency o PDEA Region 10 ang Sertipikasyon pagmatuod nga walay druga o Drug Free ang Cagayan de Oro City Jail – Male Dormitory.

 

Kini human matuman sa management ug sa mga personahe sa City Jail ang mga rekisitos sama sa sustained anti-illegal drugs campaign, pagmugna og drug free workplace policy, pagpahigayon og sunod-sunod nga drug free facility / workshop orientation seminars sa mga personahe ug sa ilang pamilya lakip na sa mga binilanggo, ilang pamilya, mga bisita ug sunod-sunod nga random drug tests sa mga personahe sa Bureau of Jail Management and Penology o BJMP ug mga preso nga pulos negatibo ang resulta.

 

Gitunol ang maong pasidungog niadtong Oktubre 11 ning tuiga human madepensa ni City Jail Warden Supt. Erwin Kenny Ronquillo ngadto kang PDEA Regional Director Wilkins Villanueva ang mga dokumento, aktibidades, polisiya sa City jail ug uban pa.


 

Matud ni Jail Officer 3 Orlando Montalban, Information and Community Relations Officer sa Cagayan de Oro City Jail nga ang maong pag-ila giisip sa BJMP nga dakong kadaugan sa kampanya niini batok sa illegal nga druga.

 

Kini pinasubay sa mando ni BJMP Regional Director nga si Sr. Supt. Luisito Munoz ug BJMP Chief nga si Jail Director Deogracias Tapayan agig pagtuman sa sugo ni Presidente Rodrigo Duterte nga sumpoon ang pagkuyanap sa illegal nga druga sa nasud.

 

Alayon niini, gihangyo ni Supt. Ronquillo ang padayon nga suporta sa katawhan sa krusada batok illegal nga druga aron makab-ot sa tanan ang luwas nga pamuyo sa katilingban.

Facebook Comments