Ha usa nga press conference ginsiring ni Guiuan Mayor Annaliza Kwan, nga hiya in nagtutuo nga labot la han cultural-history tourism nga may-ada an ira bungto, an paghost nira hin surfing competition in usa nga gihapon nga pamaagi agud makilala an ira kadagatan nga mabaysay para ha surfing.
“We are actively promoting tourism in Guiuan and surfing is one of the activities that will help boost our tourism aside from our history”.
“The significance of this, is that it will invite surfers and the surfers will tell everyone the beauty of our place,” siring ni Kwan.
Kakulop nga adlaw, September 16, 2023, gindumara an opening ceremony han mao nga kompetisyon kun diin nagtirok-tirok an 160 nga mga surfers tikang pa ha Baller, Aurora, Siargao, Allen ngan Bobon ha Northern Samar, ngan Borongan ha Eastern Samar.
An mag-dadaog ha Men and Women division in may pareho nga premyo nga nagkakantidad ha P50,000 ngan makakatagamtam pa hin 750 points nga ginkikinahanglan agud makauswag ha kompetisyon.
Ginsuportaran naman han Provincial Government ngan Congressional Dictrict han Eastern Samar an mao nga paisan-isan.
Nagpadangat hi Mayor Kwan han iya tim-os nga pagpasalamat ha mga nagpa-angbit hin bulig para maging manilampuson an mao nga aktibidad labi na ha Office of the Governor nga nag-sponsor ha premyo han mga madaog han surfing competition.
Sumala kan PJ Evardone, representanti ni Gov. Ben P. Evardone, an Office of the Governor in pirme masuporta ha mga proyekto ngan aktibidadis nga ikauupay han Eastern Samar, labi na ha turismo.
“Last year, through the efforts of the City of Borongan and with the commitment of support of Governor Ben P. Evardone, for the first time ever in the history of surfing, naging equal po ang prizes for men and women and we are doing the same here in Calico-an, Guiuan, Eastern Samar. So, this is us being consistent with our commitment to support the surfing community,” pamahayag ni Evardone.
Iginpaparayaw yana han Eastern Samar an duha nga national surfing competition, nga labot la Guiuan in mayda gihapon ha Borongan, Eastern Samar.
An 3rd leg han kompetisyon in pagbubuhaton ha Baler, Aurora ngan susundan ha Borongan ngan ha Cabugao ha Ilocos Sur.
Samtang, ginpaplanohan naman ni Mayor Kwan nga magkamay-ada hin festival nga igsasalin-urog an bungto han Guiuan ngan ine in pagtatawagon nga ‘Surfing Festival’ kun diin marerekognisar an mga surfers ngan matatagan hin panahon nga ma-promote an Calico an nga diri la kada mayda surfing competition.
