Syudad sang Iloilo-Liwat ginpamatud-an sang Calinog Taekwondo Association (CTA) ang kasampaton sang ila mga taekwondo jins matapos magkapyon sa bag-o lang natapos nga 14th Bonnel Regional Taekwondo Championship, Mayor Eugenio Reyes Cup sa Buenavista, Guimaras sadtong Enero 13, 2018.
Bilang pinakadako nga delegasyon, ginlakip sa CTA ang mga players gikan sa banwa sang Lambunao, Janiuay kag Cabatuan kag gintawag ang grupo nga CTA-Neb1.
Ginpangunahan sang CTA ang medal haul sang delegasyon mya mag syam ka gold medals para sa ila elementary players samtang may apat ka gold kag isa ka silver sa ila high school players
. Nagdugang naman ang Cabatuan nga nakakuha sang 7 ka gold isa ka silver, Neb 1 nga may apat ka gold kag duha ka silver kag ang Nicole Taekwondo Gym nga may tatlo ka gold para sa kabug-usan nga 27 golds kag 4 silvers para makuha ang over all championship.
Nangin 1st runner up ang Zarraga Taekwonod Assoiciation kag 2nd runner up naman ang Guimaras taekwondo Union.
Ang CTA-Neb 1 ginpangunahan sang mga coaches nga sanday Louis Paul Noblez sang CTA, Ben Capadosa sang Neb 1 kag Wrister Defensor kag Stevie Cercado.
Ginpasalamatan ni Mrs. Grace Perez, president sang CTA ang mga ginikanan nga amo gid nagpangabudlay kag naggasuto agud suportahan ang ila mga kabataan.
“Pasalamat kami sa mga ginikanan nga amo ang nagagasto kag nagaalalay gid sa ila mga kabataan halin sa trainings asta sa mga competition. Ini na ang bunga sang ila paghimakas,” ang pahayag ni Perez.
Sang nagligad nga Disyembre, overall champion man ang CTA sa CPJ Regional Championship nga ginhiwat sa Paref Wesbridge School for Boys Gym kun sa diin patas sila sang Diasness Taekwondo Gym.
