Davao City – Angayang konsiderahon nga guide kun giya lamang sa katawhan ang resulta sa usa ka survey diin daghang mga factors ang nagtukmod sa katawhan sa pagpadayag sa ilang opinyon pabor o kontra sa usa ka tawo, personalidad o programa sa gobyerno.
Kini ang opinyon giluwatan karon sa iladong RMN commentariat nga si Atty. Reuben Canoy atol sa interbyu sa morning primetime radio social commentary flagship program nga ‘Straight to the Point’ uban ni Radyoman June Duterte.
Segun ni Canoy, kinsa maoy tigdumalang komentarista sa pamoso na kaayong ‘Perspective’ radio critique, ang resulta sa mga surveys sama sa SWS ug Pulse Asia surveys usa lamang ka pagtugkad sa kung unsay gibati sa katawhan sa mga isyu karon sa atong panahon.
Gitin-aw sa komentarista sa radyo nga sagad sa mga surveys, anaa lamang sa 1,200 ngadto sa 1,500 ang mga respondiyentes diin ila lamang kining i-‘extrapolate’ aron makuha ang sampling nga nagrepresentar sa kinatibuk-ang opinyon sa katawhan.
Dugang ni Canoy nga ang pagkanaug sa ratings ni Pres. Rodrigo Duterte gikan sa 80% ngadto sa 60% trust and satisfaction ratings malagmit nga resulta kini sa kung unsay nahitabo sa usa ka lugar nianang tungora sama sa isyung extra-judicial killings kun EJKs nga nakabaton ug klase-klaseng reaksyon sa katawhan kalakip ang interpretasyon sa media kun mga magsisibya.
“Kining kinaiya sa media gani nga ang usa ka insidente himoong dako bitaw nga murag mao na na ang nahitabo sa tibuok, therefore out of perspective,” sumala ni Canoy.
RadyoMan Jason Amisola
