Capiz PPO, may namonitor nga operasyon sang illegal numbers game sa pila ka barangay sa Roxas City!

21

Roxas City, Capiz – Ginkumpirmar ni CPPO Provincial Director Col Canilo Fuentes nga mas labi nga ginpasangkad subong sang kapulisan sa Capiz ang monitoring kontra sa pag-operate sang illegal numbers game sa probinsya.
Suno sa iya, ini ang kasunod sang impormasyon nga may nagakatabo nga pag-operate sang ilegal nga pasugal sa pila ka banwa sa Capiz kag barangay sa Roxas City partikular sa Brgy Libas kag Brgy Dayao.
Base sa nabaton sini nga report, may yara sang nagapataya sang pick 2 kag pick 3 sa nasambitan nga mga barangay.
Samtang aminado man ini nga may pila ka mga persona ukon grupo ang pagapakig-angut sa iya nga kun mahimo tugutan nga mangin hilway ang pag-operate sang illegal numbers game.
Apang sa pihak sini, ginpanindugan ni Fuentes nga indi siya pabor sa nasambitan nga sahe sang boluhaton.
Iya man ginpaandaman ang mga yara sa likod sang iligal nga sugal nga mag-untat na bangud hugot sa subong ang kampanya sang kapulisan agud lagson ang mga ini.
Nahibaluan nga tubtob sa subong wala pa sang may gin-aprobahan nga franchise sang Small Town Lottery(STL) ang Philippine Charity Sweepstakes Office sa probinsya sang Capiz.

Facebook Comments

From Advertisers