Nibalik sa ikaduhang pwesto ang Caraga region sa labing pobre nga rehiyon sa tibook Pilipinas, sunod sa Autonomous Region in Muslim Mindanao (ARMM).
Kini ang gipadayag ni Regional Director Mylah Faye Aurora B. Cariño sa National Economic Development Authority (NEDA) Caraga sa press conference kagahapon.
Giklaru sa opisyal nga padayung nisaka ang ekonomiya sa rehiyon apan mas hinay kini kompara sa ubang mga rehiyon hinungdan nga nabutang pagbalik sa ikaduhang dapit ang Caraga sa labing pobre nga rehiyon.
Daan nang nabutang sa ikaduha ang rehiyon niadtong 2009 apan nahaw-as kini sa top 10 niadtong 2012 apan sa ulahing survey sa tuig 2015 nabalik sa ikaduha ang rehiyon, diin himoon ang economic survey sa matag tulo ka tuig ug lauman ang sunod survey karong tuig 2018.
Nigawas usab sa pagtoon nga ang sector sa mag-uuma ug mananagat ang labing kabus ning rehiyon samtang ang operasyon sa mina maoy nagbuhi sa ekonomiya sa Caraga region.
Laing pagtoon sa NEDA nagbutyag nga ang kakulangon sa mga manufacture companies ning rehiyon ang rason nganong mabiyaan ang Caraga sa pagsaka sa ekonomiya diin gitumbok nga ang problema sa insurhensya ang gitudlong hinungdan nganong magdumili ang mga investors luyu sa kanunay pag-imbitar sa mga local nga opisyal. (by: Kasamang Archer Capadeso)
