CARETAKER NAN SURIGAO CITY PUBLIC CEMETERY TAG-ANGKON NA MAY PIPILA KA LUBNGANAN NA NAGUBA ADTON KUSOG NA LINOG ADTON PEBRERO, MGA KALUMUNAN WAYA DAJAWA O ALIMATA
Namahayag si Allan Espinoza, an caretaker sa Surigao City Public Cemetery, human nasinati an kusog na linog adton Pebrero 10 sa magnitude 6.9, may pipila ka lubnganan an naguba ug an bukog sa taglubong an nakita na. Tagtudlo niini, nohimo na sila nan koordinasyon sa mga kalumunan ug nanag-ija niini pero waya pa dajawa nan mga ini an lubnganan ug an iban waya pay pinansiyal na ikagasto. Hinoon para dili makita sa mga lumalabay an inin bukog sa tawo gikan sa nokang-a ug naabri na mga lubnganan, ila na lamang ini tagtabunan nan sako.
Tag-angkon pa ni Espinoza na hapit na-okupar an kinatibuk-ang 7 ektarya sa lupa sa pampublikong sementeryo ugsa na posible sa 2018, waya nay bag-o na mahilubong. Bana-bana niini na kapin 30,000 na an nalubong sa amo na sementeryo.
Tagpadayag pa niini, nohimo sila nan koordinasyon ngadto sa mga nagrenta nan espasyo sa lubnganan na i-turn over na ngadto balik sa ila an mga espasyo para may kalubngan pa sa iban na manginahanglan. Tag-angkon ni Espinoza, tag-P50 kada tuig lamang an bayad na ila tagsukot ngadto sa mga taglubong sa Public Cemetery pero maarang gihapon an waya makabayad. An iban isab na tagbalhin na an mga lubnganan ngadto sa pribadong sementeryo an waya pa tag-uli ngadto sa ila an mga espasyo kay matud pa gamiton pa sa ila laing kalumunan na mihalin na sa laing kalibutan.
Dugang pa ni Espinoza, ila taglauman na modagsang an maarang na mga tawo kuman adlawa hangtud silom Nobyembre 2 sa mga mobisita sa sementeryo.
