General Santos City— Anaa na sa mga kamot sa kapulisan ang cartographic sketch sa suspek nga mipusil patay sa usa ka 27 anyos nga babayeng negosyante sa Barangay Apopong nga si Freya Joy Cuevas. Unang gibutyag ni Police Capt. Rissa Hernaez, tigpamaba sa Gensan City Police Office (GSCPO) nga aduna na silay gihuptan nga testigo sa maong pagpamusil, apan wala pa kini nagpakita sa imbestagador.
Maglisod matud pa sila gumikan pinaagi lang sa telepono ang koordinasyon sa nasangpit nga testigo apan nagpasalamat gihapon sila tungod aduna nay inisyal nga hulagway ang suspek sa krimen. Ilaha nalang karon ginasuta kung nag-match ang kuha sa CCTV bahin sa suspek ug ang diskripsyon sa testigo.
Samtang dili pa usab makumpirma ni Police Capt. Hernaez, ang motibong love triangle sa pagpusil-patay sa biktimang si Freya Joy Cuevas, kini gumikan ilaha pang ginahulat ang pamahayag gikan sa pamilya sa biktima may kalabutan niini. Sumala niya nga padayon pa ang ginahimo nga imbestigasyon kalabutan sa maong kaso.
Dugang pamahayag ni Capt. Hernaez nga ubay-ubay nga mga anggulo ang ilahang ginatan-aw sa maong krimen lakip na ang negosyo ug robbery human nga gikuha sa mga suspek ang mga personal niining gamit . Nagpahigayon na matud pa sila ug back tracing pinaagi sa pagsuta kung aduna kini mga napa-blotter kaniadto, kung adunay mga nakalaban o mga bahad sa iyahang kinabuhi ayha nahitabo ang pagpamusil. Pag-angkon niya nga hangtud sa karon, wala pay gipagawas nga unsa mang pamahayag ang kabanay sa biktima. (LVR)
