Davao City – Gi-awhag ni Davao City First Councilor Edgar Ibuyan, Sr. ang nasudnong gobyerno nga susihon usab ang Philippine Amusements and Gaming Corporation (PAGCOR) kung asa napadulong ang dakung income niini.
Sumala ni Ibuyan, dinagku ang income sa PAGCOR gikan sa mga sugal sa Casino Filipino ug mga online gaming operations nga gipadagan sa mga kumpanya nga gihatagan og lisensiya maka-operate.
Wala gitino sa konsehal kun pabor ba kini o dili nga lakip sirad-an ang PAGCOR apan kun ugaling naputos usab sa korapsiyon ang maong buhatan, angay lamang usab hunungon ensigida ang operasyon niini ug imbestigahan.
Ug kung masusama ang PAGCOR sa nadangatan sa PCSO sa isyung korapsyon, pupaigo ang pondo ang Office of the President aron mapadayon ang paghatag og ayuda ngadto sa katawhan nga naggilaid sa tumang kalisud kinsa kasagaran kanila walay sarang ikabayad sa ospital panahon sa pagpatambal.
Aduna pa’y ubang ahensiya nga nagahatag og tabang-pinansiyal sa mga nanginahanglan sama sa DSWD, Philhealth, Malasakit Centers ug daghan pang uban nga pwedeng madangpan, dugang sa konsehal.
Nasabtan ni Ibuyan nga tuyo sa pamuno-nasud sa pagpasirado sa lotto gaming operations mao ang pagsilhig sa mga kawatan ug paglimpyo sa PCSO.
Daku ang pagsalig ni Ibuyan nga ibalik ra gihapon sa pamuno-nasud nga sa ngadto-ngadto, mabalik ra sa normal ang operations sa gi-kwestyon nga legalized gambling.
RadyoMaN Joel Viray
