Davao City- Wala na sa popularidad o maayo nga mangistorya atol sa kampanya ang angayang lantawon sa mga botante sa usa ka kandidatong musunod nga mulingkod nga Presidente sa Pilipinas.
Sumala ni Ramon Casiple, Institute For Political And Electoral Reform Executive Director, ang pandemya ug ekonomiya maoy pinakaunang atubangon sa bag-ong presidente busa kinahanglan kahibalo kini muhatag og solusyon sa maong mga immediate concern sa nasud.
“Payo ko sa mga botante tiyakin niyo iyong bobotohin niyo, hindi baleng popular basta may alam, hindi na baleng unpopular siya basta marunong kung paano i-handle ang pandemya at ekonomiya (ng bansa),” segun niini.
Gibutyag ni Casiple, sa tanang mga nilutaw nga pangalan sa Presidential bet, si Vice President Leni Robredo ang para kaniya pinakaandam sa posisyon apan dili pa kaayo dugay ang experience niini sa pulitika.
Samtang makonsidera niini nga baguhan pa alang sa national politics ug governance si Davao City Mayor Sara Duterte kung itandi sa kaagi sa iyahang amahan nga si Presidente Rodrigo Duterte kinsa niagi na usab pagka-Congressman apan dako usab ikatabang sa pagka-Presidential daughter niini tungod masundan sa alkalde ang mga aktibidad sa pangulo.
Ug ang mga nahimong maayong inisyatibo ug programa ni Mayor Isko Moreno sa Manila ang dakong matabang sa iyahang kandidatura sumala ni Casiple.
Apan sumala ni Casiple daghan pa’g posibleng mahitabo ug depende sa kalaban o kaatbang ang mamahimong strengths ug weaknesses sa mupapili nga musunod nga pagka-Presidente sa Pilipinas.
RadyoMaN Aimee Guinita
