Ta prepara ya el maga pulis dos caso que el planta contra con un official del LTO y deste dos companiero conquien ya cuji durante el buy-bust operation ya conduci el maga pulis del Central Police Station del Biernes por la tarde.
El buy-bust operation ya resulta na aresto di canda Abdul Mutin y Paunte, 40, casao, operation officer del Land Transportation Office base na Ecozone, Talisayan; Saudie Hairul y Tanusi, 42, casao, volunteer worker del LTO y si Gairel Tacurian y Akalan, 38, negociante de Sta. Barbara.
Maga pulis ya recobri dos paquete de shabu y el P200 marked desde na possession di Tacurian mientras maga paraphernalia de shabu ya recobri na possession di canda Mutin y Hairul.
Con el tres ya aresta na 999 Traders Inn Pension house na Lim Town building serca man alas 6 del noche na La Purisima Street del Biernes.
Caso del violacion del section 5 y 13 del Republic Act 9165 el planta na corte contra con el tres persona.
