Davao City – Pasakaa’g kasong Reckless Imprudence resulting to Multiple Serious Physical Injury and Damage to Property ang driver sa sakyanan nga nidasmag sa upat ka mga behikulo sa Brgy. Catalunan Grande ning syudad kagabii.
Ang driver giila nga si Rex Carcallas, 38 anyos, minyo, engineer, residente sa Ruby Subd., Catalunan Grande, kinsa gituohang wala sa tarong nga panghuna-huna atol sa panghitabo samtang sakay ang asawa niini nga si Lilybeth Alipio, 40-anyos.
Sa inisyal nga imbestigasyon sa Talomo PNP, nasayran nga alas 10:30 kagabii, gikan CP Garcia Highway si Carcallas nga nagmaneho sa usa ka Hyundai Elantra apan pag abot niini sa corner SGR Village ug South Villa heights II sa Catalunan Grande, nasaghiran niini ang usa ka Mitsubishi L300 van gani sa kakusog sa impact nidiretso kini sa Sitio Ubat diin laing naka-parking nga Suzuki Multicab ang nadamay.
Sumala ni Police Officer 1 Sherwin Deligero, ang traffic investigator, nga posible’ng nalisoan sa pangisip ang magtiayong Carcallas gumikan atol sa pagpamedical sa Southern Philippines Medical Center (SPMC) kagabie, nag ‘panic attack’, nagyawyaw ug wala sa maayong pangisip matud pa ang magtiayon.
Gikanayon ni Deligero nga upat ang angol sa maong insidente diin ang duha nga sila si Reo Jim Cabajug, 21-anyos, jeepney driver, nagpuyo sa Purok Acasia Matanao, ug si Samuel Jake Crayon, 21-anyos, estudyante ug residente sa Lozano St. Sitio Eskwela sa Catalunan Grande nakagawas na.
Samtang ang laing duha nga sila si Rodrigo Emplamado Jr., 34-anyos kinsa nagmaneho sa single motorsiklo, nagpuyo sa Ulha Village, Ulas, Pomelo St. ning siyudad, ug si Doran Martinez, 23-anyos, nagpuyo sa Blk. 18, Lot 52, Catalunan Grande ning siyudad anaa pa gitambalan sa SPMC.
Ang magtiayon parehong balhog na sa Talomo Police Station.
RadyoMaN Don Pulayao
