Sarangani Province—Pormal ng gilusad kagahapong adlawa ang Catch-up Immunization program sa Department of Health, Provincial Health Office, Municipal Health Office og mga barangay health team sa probinsya sa Sarangani malabanan ang sakit nga tipdas nga usa na karon ka national epidemic. Nahitabo kini sa Sitio Malinis, Barangay Tamban, Malungon, Sarangani Province.
Hugot ang panawagan ni Doctor Arvin Alejandro, ang provincial health officer sa probinsya sa Sarangani, nga pinaagi sa maong catch-up immunization program, pwedeng magpabakuna dili lang kadtong singko (5) anyos paubos kundili apil usab kadtong nag-eskwela nag Kinder kon sais (6) anyos paingon Grade 6, ingon man ang mga hamtong kinse anyos (15) pataas, kadtong tanan nga wala pa nabakunahan o dili ba kaha one (1) dose pa lang ang nabakuna.
Matud pa ni Alejandro, dili idamay ang bakuna sa tipdas sa nahitabo sa bakuna sa sakit nga dengue nga Dengvaxia tungod kay tuig 1967 pa namugna ang bakuna sa tipdas samtang ang Dengvaxia ang bag-uhay lang na-imbento.
Nagpasalamat na lamang si Tamban Kapitan Virgilio Asgapo ngadto sa programa nila Governor Steve Chiongbian Solon og Malungon Mayor Tessa Constantino tungod kay gipaduol matud pa sa mga kabarangayan ang health program kaabag si Pangulong Rodrigo Duterte. Gidayig usab sa kapitan si Governor Solon tungod sa dakong kausaban sa kalambuan sa Sarangani Province, wala ra gitagad matud pa ang mga lugar “along the highway” kundili ang lagyong kabukiran.
