Davao City – Gibasol karon sa grupo nga Coalition of Concerns for Family of the Philippines (CCFP) ang presensya ug impluwensiya sa social media nga usa sa dakung hinungdan nga matukmod sa pagkamatay sa mga batan-on karon.
Sumala sa CCFP Focal Person Pastor Jun Sorongon, daku og papel ang social media sa insidente sa paghunos sa kinabuhi sa mga batan-on karon itandi kaniadto nga sa wala pa kining nasangpit nga matang sa social platform.
Segun ni Sorongon, sa una nga tri-media pa lamang ang nag-exist, ang kabataan kaniadto sa television, radyo ug mantalaan lamang mutan-aw, maminaw ug makisayod sa mga panghitabo.
Apan sukad nahimugso ang internet ug social media ang kabataan karon walay kukahadlok nga mosundog sa ilang mga nakita sa internet sama pananglitan sa pag-suicide online.
Ang social media nagpaanod og dautan nga impluwensiya sa kinabuhi ug kinaiya sa mga batan-on kun kining gitawag nga mga ‘subliminal messages’ sama sa pagtipig og problema diin sa dihang mobusikad na kini, ulahi na unya ang tanan sanglit ang na-depress nga batan-on malagmit nagtubok na sa iyang kinabuhi.
Kadaghanan sa mga batan-on nga naghunos kadtong kuwang og gugma sa ilang mga ginikanan ug ang nahimong gawasanan sa ilang suliran mao ang social media nga maoy migalgal aron sila maghikog.
Ang paglig-on sa puwersa sa pamilya, simbahan ug gobyerno kun tulo ka haligi sa katilingban mohatud unya og epektibo nga pang alkontra sa social media nga padayon nagbitad sa kabataan ngadto sa peligroso ug delikadong kahimtang.
Ang gikahadlokan pa ni Sorongon mao nga kun makalusot na unya ug mamahimong balaod ang SOGIE Bill, mas daghan pa sa mga kabataan ang musangko sa paghikog kun pagpakamatay ilabi na kun dili madawat ang bag-ong nakaplagang pagbati sa ilang pagkatawo.
Nagtoo ang CCFP official nga kun mapabati lang sa mga ginikanan ang mensahe sa ilang gugma, matudloan sa espiritwal nga aspeto ug makasinati sa konkretong programa sa gobyerno, daghan pang kabataan ang maluwas gikan sa gahum sa kangitngit nga naggalgal kanila aron mag-suicide.
RadyoMaN Joel Viray
