Gunit na sa Surigao City Police Office ang kuha sa CCTV sa riding in tandem nga mipusil patay ni Dinagat Islands Board Member Wenifredo Olofernes .
Sigun ni P/LTC Randy Amaro, hepe sa Surigao City PNP nga dili maklaro ang panagway sa duha ka mga suspek sa unang kuha sa CCTV nga ilang nakuptan mao’ng padayon silang nangalap ug laing kuha sa CCTV sa ubang mga establismento diin posibleng milabay ang mga suspek.
Kung makumpleto na nila pagkuha ang kopya sa tanang CCTV footage hayan nga makonektar ang imbistigasyon ug masayran ang lihok sa mga suspek nga maoy dalan unya sa pag-ila ug pagsikop kanila.
Dugang sa opisyal nga makatabang sa gihimu nilang imbistigasyon sa kaso ang gitanyag nga 100,000 pesos reward money sa Police Regional Office 13 nga andam ihatag sa kinsa mang makatudlo sa pulis kung kinsa ang mga mamumuno.
Kahibaloan nga nagpasar ug resolusyon ang Sangguniang Panlalawigan sa Dinagat Island Province nga nagkondina sa maong insidenti ug usab giduyogan sa tanang empleyado sa Kapitolyo sa pagpanguna ni Gov. Arlene “Kaka” Bag-ao, pinaagi sa pagsuot ug itom nga t-shirt atol sa flag raising ceremony.
[image: olofernes.jpg]
