Davao City – Nagkalain-laing reaksyon ingon man gibati sa mga residente ang natala sa Davao City Disaster Risk Reduction and Management Council kun CDRRMC human nahibal-an nga adunay mga gambalay ug establishemento ang nasulod sa Lacson ug Dacudao faults subay sa gilusad nga ‘Walk the Fault’ sa PHIVOLCS uban ang mga ahensya sa gobyerno sa Bago Oshiro ug Brgy. Mintal dinhi sa syudad.
Kini ang gibutyag ni Alfredo Baluran, chief sa CDRRMC atol sa ispeak forum.
“Ang uban man pud nalipay (kay nakabalo sila sa fault lines), ang uban mupalayo ato nga lugar, ang uban nagmahay kay nasayangan sa mga property nga anaa diha,” segun ni Baluran.
Subay niini, padayon nilang pahimangno ngadto sa mga residente nga anaa sa fault lines nga kanunay mangandam gani anaa usab sa mga residente ang desisyon ug ila pang palig-unon ang mga natukod nga balay o gambalay o di ba kaha mubalhin og laing lugar nga layo sa fault lines.
Dugang niini, giklaro ni Baluran base usab sa giingon sa Phivolcs nga mamahimong makatukod og mga balay o establishemento lima ka metro gikan sa fault lines.
Samtang, planong ipadayon sa CDRRMC ang ‘walk the fault’ sa syudad aron mahibal-an pa ang ubang lugar nga anaa sa laing tulo pa ka mga fault lines nga mao ang Tamugan, Pangyan ug Carmen Biao.
RadyoMaN Renz Barbarona
