Davao City – Anaa sa 60 ka mga establisemento sa syudad sa Davao ang nadamyos human sa 6.6 magnitude nga linog nahitabo kagahapong adlawa diin Intensity VI ang nabati sa dakbayan.
Kini base sa inisyal nga assessment sa City Disaster Risk Reduction Management Office (CDRRMO) atol sa gipahigayong AFP PNP Presser sa adlaw’ng Miyerkules.
Sumala ni CDRRMO head Rodrigo Bustillo nga pareho kining sa pampubliko ug pribadong tulunghaan ingon man mga gambalay sama sa Ecoland 4000 condominium.
Giabisuhan ni Bustillo ang mga tenants sa maong gambalay nga mu-bakwit na diin kini gihulagway nga dunay ‘structural failure’ ilabi na nga padayon pa kita’ng makasinati og aftershocks.
Ginatutukan usab karon sa maong ahensiya ang mga shopping malls ug skwelahan kinsa gi-awhag ang mga tigdumala nga mag hire na og kaugalingong engineers aron mosuta sa ilang mga gambalay.
Samtang nag padayon sa pagsuta ang mga taga Office of the City Building Officials sa mga gambalay sama sa City Hall ug SP Building diin matud pa safe kini nga gamiton ug walay nakita nga damyos.
RadyoMaN Jason Amisola
