CDRRMO magpahigayon og assessment sa mga pagbaha sa syudad

Davao City – Nasuta karon sa assessment sa Davao City Disaster Risk Reduction and Management Office (CDRRMO) nga ang sagad dali mabahaan panahon magbundak ang makusog nga ulan mao ang distrito dos ning syudad sa Davao.

Sumala ni CDRRMO Head Alfredo Baloran, kini mao ang Barangay Buhangin sa NHA, San Isidro, Laverna Hills, Barangay Aliongto, paubos paingon sa Buhangin Memorial Park gikan sa Buhangin Police Station ug Purok Sta.Maria sa Barangay Cabantian ug downtown area nga makasinati usab og street flooding.

Natumbok na karon ni Baloran, ang ugat hinungdan sa paspas kaayo nga pagbaha sa maong mga dapit ug kini mao ang mga waste materials gikan sa mga construction, basura nga nakabara sa mga imbornal nga moresulta sa pag-awas sa tubig gikan sa mga kanal hinungdan sa pagbaha sa naasoy nga mga barangay.

Kabahin sa rekomendasyon karon sa CDRRMO mao ang paglimpyo sa mga kanal aron matanggal ang basura ug lapok nga nakabara aron dili na mobaha.

Hinoon, naghunahuna na karon og technical solusyon ang City Engineer’s Office sa mga drainage system, aron ang mga motorista dili na matanggong tungod dili makalabang dayon sa dalan hatod sa baha nga masinati sa syudad sa Davao.

RadyoMaN Joel Viray

Facebook Comments